गगन थापा सभापति उम्मेदवार !

काठमाडौं–संस्थापन पक्षका नेता तथा कार्यकर्ताको चौतर्फी दबाब पश्चात् कांग्रेस युवा नेता गगन थापाले सभापति पदमा उम्मेदवारी दिने तयारी गरेका छन् । थापाको उम्मेदवारीलाई कांग्रेसमा पुराना नेताविरुद्दको विद्रोहको रुमा लिइएको छ । तर, उनको उम्मेदवारीले वरिष्ठ नेता शेरबहादुर देउवाभन्दा सुशील कोइराला र रामचन्द्र पौडेललाई सकसमा पार्न सक्ने देखिएको छ ।

यसअघि सुशील कोइरालाको विशेष सहयोगीको भूमिकामा देखिँदै आएका आमोदप्रसाद उपाध्यायसमेत गगनको पक्षमा उभिएका छन् र उपाध्यायको यस्तो निर्णयले कोइराला पक्षलाई स्तब्ध बनाएको छ । गगन थापालाई उनका ससुरासमेत रहेका अर्जुननरसिंह केसीसँग जोडेर हेर्नेहरु गगनको पछिल्लो गतिविधिबाट चकित परेका छन् ।

गगनको साथ पाएर महामन्त्री बन्ने अपेक्षा गरिएका केसी पनि आफ्नो ज्वाइँको भूमिकाबाट सशंकित बनेको बताइन्छ । यद्यपि गगनले अहिलेसम्म तेह्रौं महाधिवेशनमा सभापतिको उम्मेदवार बन्ने औपचारिक घोषणा गरेका छैनन् तर उनको सभापति उम्मेदवारीको चर्चा मिडियामा पनि छाउन थालेको छ।