दशगजामा बसेर टाउको फुटाउँदैमा समस्याको समाधान हुदैन -सिटौला


पर्वतः नेपाली कांग्रेसका महामन्त्री कृष्णप्रसाद सिटौलाले दशगजामा बसेर टाउको फुटाउँदैमा तराई मधेसमा जारी समस्याको समाधान हुन नसक्ने बताएका छन् ।

अमृत जोशी स्मृति प्रतिष्ठान पर्वतको आठाँ स्मृति सभालाई आज सम्बोधन गर्दै महामन्त्री सिटौलाले संविधानमा चित्त नबुझे संसदबाटै समाधान गर्न सकिने बताउँदै दशगजामा बसेर भुपरिवेष्ठित मुलुकको पारवहन अधिकार रोक्दैमा उनीहरुले मागेको अधिकार दिन नसकिने स्पष्ट पारे ।

संविधान निर्माणको अन्तिम क्षणमा बहिष्कार गरेपनि अब संशोधन गर्न सकिने अवस्था रहेकाले दशगजामा जानुभन्दा संसदमा आउन मधेसवादी नेतालाई उनले सुझाव दिए ।

राष्ट्रिय एकताले मात्रै नयाँ संविधानको कार्यान्वयन सम्भव रहेको बताउँदै उनले मुख्य दलहरूबीचको सहकार्यले मात्रै नयाँ संविधान जारी भएकाले संविधानको सहज कार्यान्वयनका लागि पनि दलहरूबीच राष्ट्रिय एकताको आवश्यकता रहेको उल्लेख गरे । रासस